ثورة شباب مصر

ثورة شبابك


اللى ما مشيش فى ميدانِك..

اللى ما اتهانش عشانِك..

اللى ما اتحملش قسوة جلادينك..

واللى باعك واللى خانِك..

اللى ما اتعطرش فمه من ترابك..

واللى عادى واللى صابك..

كلهم سمعوا خطابك..

كلهم وقفوا قُبالك..

يضربولِك مِيت سلام..

كلهم وقفوا طابورك فى الصباح..

وف صباح الدنيا عُدتى

مرة تانية للصفوف..

تترفع لاجلك كفوف..

كف يدعى لكِ بنصرِك..

كف يدعى يحمى جندك..

كف يُلطش كف جاير..

كف يبنى لك عماير..

وكف يحميكى يا مصر..

اللى شفتيه من شبابك..

هو عزك..

يرسمولك من دماهم..

ألف عزة وألف نصر..

احفظيهم يحفظوكى..

ارفعيهم يرفعوكى..

سلميهم أمرك الموكول لغيرهم..

تسلمى بْهُم.. يسلمولك..

سلميلهم راية العز وجهادك..

دول عتادك..

يحموا ضهرك..

من فجور الدهر لو فكر يعاند..

وأنا ثاير..

لاجل أحرر كفك المصبوغ بدمى..

وكفى الشبعان بطينك..

ثورة القهر اللى طافح فوق جبينك..

ثورة الشاب اللى مهره هو كفنه..

واللى مزماره عويلك..

واللى توب فرحه.. نخيلك

واللى عرقه من جبينك..

ارجعيلهم

يرجع الدم لوريدك..

ياللى اسمك زان وشوشهم..

واللى حضنك كان واحشهم..

غصب عنهم..

لما شافوا القهر راكب..

لما شافوا الظلم راكب..

جُم مراكب..

جُم وصلًّوا العصر قصر..

شدوا حيلهم.. وع المغارب

فارق الطاغى ديارك..

سكنوا دارك..

واختارولك فوق جبين النيل مكانك

أيوه فوق النيل مكانك..

أيوه فوق النيل ده مصر